يوميات زوج ايام الحظر
بعد ليلة طويلة
من ليالي الحظر الحزينة
قولت بكره الجمعة
اصحى من ألنوم براحتي
طول الوقت بصحي بدري
اجازة مفيش حاجة تقلقني
بس واخد عهد علي نفسي
هخلي الكل براحته
انا حافظ تعليمات المدام
لازم اكون شاطر واسمع الكلام
انا لا حمل عتاب ولا ملام
صحيت من النوم الساعة عشرة
بشويش خايف اطلع همسة
خلي الكل نايم براحته
مش هصحي حد
خلي كل واحد يصحى لما ياخد من النوم كفايته
بتحرك في الشقة بحساب
بمشي على طراطيف صوابعي
لسه كلام المره اللي فاتت بيرن في وداني
موش ناقص اسمع كلام يسم بدني
لازم اكون عاقل كافي خيري شري
حتى الساعة ماعنداني
موش بيتحرك غير عقرب الثواني
عملت قهوة وبعدها شاي
لسه الساعة عشرة ونص
يا ساعة اتحركي بسرعة
عشان الكل من النوم يصحي
فكرت افتح التلفزيون
لكن خوفت من علو الصوت
دخلت المطبخ تاني
كان نفسي اشرب عصير
لسه هاشغل الخلاط رجعت بسرعة لعقلي
الخلاط هيزعج كل اللي حولي
دخلت وقعد على الكرسي
الافكار دايرة في رأسي
قولت احسن حاجة انزل اتمشي
اجيب الفطار واشتري الجورنال
عقبال ما ارجع تاني
يكون الكل فاق من النوم
نزلت الشارع
قلبي كان هيتوقف
معقول اللي شايفه بعيني
اول مرة في حياتي
الاقي شارعنا فاضي
الساعة حتاشر دلوقتي
كل المحلات قافلة
الشوراع على عروشها خاوية
مشيت في طريقي
عديت على المسجد
سمعت أبوابه بتبكي
بتسأل عن المصلين
بتقول راحو فين
قلبي بكى معاها
عيني نزفت من صوتها
مسحت دموع قلبي
قولت اكمل طريقي
ماشي والله ماشايف بعيني
دخلت شارع جانبي
كنت بمني نفسي
الاقي حركة
لكن خابت ظنوني
كله نفس الحاله
المحلات والقهاوي مقفولة
وصلت لبياع الجرايد
لقيتها كل على الرفوف
السلام عليكم ياحج عبد الرؤوف
وعليكم السلام ياحج صبري
بيتكلم وهو حزين
شوف حتة ميكروب مابيتشاف بالعين
شوف عمل ايه فينا
وقف الدنيا كلها
تعالي اتفرج
الجرايد اللي كانت بتخلص من بعد الفجر
اهي مركونة على الرفوف
الناس مرعوبة من الخوف
الكل خايف من الكورونا
لازم نخاف ياحج عبدالرؤوف
لازم ناخد بالاسباب
ربنا ينجينا ويحفظ البلاد والعباد
هات ياحج الاهرام
خلينا نشوف أحوال الدنيا
اخد الجورنال ومشيت
افتكرت اني عايز اجيب الفطار
لسه بعدي الشارع
سمعت صوت الاذان
الصوت نساني الحظر
بحركة عفوية
لقيت نفسي بسرع الخطوة
علشان اوصل المسجد بسرعة
مرة واحدة فوقت على الصدمة
صوت المؤذن بيبكي
صلوا في بيوتكم
صلوا في رحالكم
جسمي ارتجف
قلبي من جديد نزف
افتكرت دموع ابواب المساجد
لاحول ولا قوة الابالله العظيم
رحمتك يا رحمن يارحيم
معقولة جه الزمان
اللي تتقفل ابواب المساجد
لك الأمر يارب
كملت طريقي
نسيت انا خارج ليه
ماشي رجلي مش شيالني
سمعت صوت بينادي علي
بصيت لقيت واحد صاحبي
قال السلام عليكم
لسه بمد له ايدي
قال في ايه ياصاحبي
انا موش ألقيت عليك السلام
مفيش سلام باليد
اوعي تسلم على حد
نفذ التحذيرات واسمع الكلام
الكورونا ممكن تتنقل باليد
هى ماتفرق بين حد وحد
ادعي ياصاحبي ربنا يجعل لها حد
ضحكت بيني وبين نفسي
لقيت صاحبي بيقول لي
عارف ياصاحبي اللي بتفكر فيه
بتفكر في اللي كان بيحصل لما تقابلني
كنا على بعض بنجري
ناخد بعض بالاحضان
بوسة شمال وبوسة يمين
مع اننا على بعض مش غايبين
لو اتقابلنا في اليوم مرة او اتنين
لازم ناخد بعض بالحضن
اهو جه اليوم
اللي نسلم على بعض بالكلام
بالاشارة
خايفين من العدوة
بعدين معاكي ياكورونا
هتوصلينا لغايت فين
في البيت حبستينا
عن الشغل منعتينا
قفلتي بيوت الله في وشوشنا
باقي ايه تعمليه فينا
مشيت في طريقي
كل المحلات قافلة
الشوراع فاضية
الساعة وصلت واحدة
رجعت للبيت
لقيت الكل لسه نايم
قولت اتوضا و اصلي
ارفع أكف الضراعة لربي
صليت ورويت السجادة بدموعي
يارب احفظ اهلي ووطني
كل الانسانية يارب من الهلاك نجي
ضاقت بينا كل السبل
كل الابواب قفلت قصادنا
مافي غير بابك قصادنا
يارب انظر لنا نظرة
بأمرك زيح عن البشرية الغمة
الكل اعترف بالعجز
هون علينا ايام الحظر
اكتب لعبادك النصر على هذا الوباء
بفضلك وكرمك يارب الارض والسماء
تقبل من عبادك الدعاء
صبري حسين
ليست هناك تعليقات:
إرسال تعليق