20
وقت الحساب أهو حان
ياخاينه وف سكتك بالبخس بعتيني
وشربت من قلتك المر اللي يكفيني
ماعدشي فيكي رجا ولا عدتي تهميني
ولا كانت المسأله ف أنك تخصيني
مكتوب علينا البلا وأهو انت بلاتيني
والهزل والمهزله في إنك تساوميني
إما يهون الشرف وإما ترميني
ياهاينه وإتغيرت من سوءك موازيني
وإن كان فؤادي إنغوى لجلن تربيني
كنت المريض والدوا لما انت سبتيني
سؤال وعايز أسأله وتعالي جاوبيني
بجد أنا الخسران ولا إنت خسرتيني
أنا اللي خني الزمن ولا إنت اللي خونتيني
أنا اللي هانه المرار ولا إنت اللي هنتيني
ولا في زمن العفن ياسبه ف جبيني
أنا اللي كنت السبب إن إنت تسبيني
وماعدش فارق قوي لما إنت بعتيني
وأرجع أعيد السؤال وأنا حافظ المضمون
إن الشيطان لو غوى بيبين المكنون
وإنك ف بحر الهوى بتشتهي بجنون
والرغبه كانت أمل لكيانك المفتون
واللي يبيع الشرف بقا سهل إنه يخون
وإنت كيانك رخص واللحم صار معفون
معروض ومين يشتري ولكل سلعه زبون
طراطير في زمن الغلا والرخص أصله ماعون
تلهيهم الجلجلا وسيف الدناوه يكون
واللي يجافي الدهب بقا ف التراب مدفون
ياللي انت بعت الدهب وبتدعي الحرمان
أنا كنت شايفك وعارفك وقاصد الكتمان
صابر وعندي أمل يتلجم الحيوان
لقيت النوايا عرايا وماعدش ليها ميزان
وبجد خاب الرجا وإتحكم التعبان
سم الأحابي إتفرش والواطي أصله بان
يا أهل الحلال إفهموا إن الخسيس خوان
واطي ومهما على برضه مالهش أمان
ولو ماضيه إندفن ريحته في يوم هتبان
واللي يعيش العفن والغالي عنده هان
ميهمهوش صفحته ..سوده وبيضه سيان
ومهما يدور الحجر فيه وقفه للدوران
هتلطه وقفة زمن ويبقا حسابه حان
واللي بغدره إبتدى مبيبتغيش إحسان
ومهما طال المدى هطولك الأحزان
وبإيه يفيد الندم لما الحقيقه تبان
وكيان مريض يتبنى ملبوس بأسوأ جان
لابد يوم يتهدم وتهده كلمة كان
خالد موسى السيد
ليست هناك تعليقات:
إرسال تعليق