قصيدة (( جوازئيات )) للفنان (( مصطفى مراد )) دنيا الإبداع والمبدعين

 "جوزائيات "

ومخلوق انا مني وشوش تانيين ..

ملامحها بتشبهني ..

ولكن روحها تشبه ناس ماهيش شبهي ..

وشوش باهتة ..

تجرسني وتشبهني ..

ما تشبهني ..

صحيح صوتي ..

صحيح تنهيدتي وسكوتي ..

ولكني ..

مابعرفهمش ..

ده مش دمي ..

اصل الكلام ده مش مني ..

تقول جنّي !!

بكون عايز اقول احمر .. فلاقيني بسودها ..

وباجي ارسم الكُحلة .. فبعميها وازودها ..

وبحلفلك ع الماية تجمدشي ..

ماهوش وشي ..

وشوش تانيين ..

عيوني ف حضرِتك تلمع ..

عيونهم ف اللقا .. باهتين ..

انا تايه بقالي سنين ..

وببعت فيا ١٠٠ مرسال ..

مايوصلنيش ..

بوشوشني ..

ما بسمعنيش ..

يكونش الوش ده وشي ؟ ..

وانا وشي ماهوش وشي !!

مابفهمشِ ..

بكون بضحك وانا المهموم ..

واكون مهموم وانا بضحك ..

وحبة لخبطة فيا ..

وملامح مني منسية ..

هلم الباقي من وشي ..

و أسيب عفاريتي تتنطط ..

ما تهمدشِ ..

خلاص همشي ..

_____________

شوية هرتلة

مصطفى مراد