أرض الملايكه
الأرض لما إتلوثت
عملت جفا
بين أي طهر وأهلها
وبين الوفا
أرض الملايكه
.................
دي حلم للصابرين
صابرين على غلبهم
وبوهمهم عايشين
بادرين بذور الرجا
من غير رجا ماشيين
شادين حبال الأمل
ويلقوا الحبال دايبين
دايب يا حضن الأمل
وأهل الأمل مساكين
****
أرض الملايكه إنتهت
أرض الملايكه إنتهت
وما عدش ليها وجود
ملاك وفوق في السما
إيه ينزله لجحود
لناس أصابهم عما
والحق صار محدود
وأحلى كلام تسمعه
بقا بالنفاق مشدود
ويعلى صوت الوتر
مبحوح يا صوت العود
وعود بيعزف مطر
مستثنى منه الجود
نازل لأرض الحجر
وقلب الحجر بيسود
****
أرض الملايكه إنتهت
والحلم بيهم كان
يا خايبين الرجا
الرك عل الانسان
داقق ببان الخبل
وبذله باني كيان
مستني يجي الفرج
أو يرحل السجان
مسجون في وسط الرحا
متغطى بالأحزان
بيذل نفسه قوي
وراضي يكون متهان
ماتشوفوا فين الخلل
لجل الحقيقه تبان
إنطق وإصرخ وقول
ليه بس تبقا جبان
ليه السكوت ع الحق
أو إنتظار الجان
أنطق وقول بقا لأ
يا إما تبقا شيطان
****
أرض الملايكه سما
وأرضنا أكاذيب
ديابه بتحرس غنم
وراعيها برضه ديب
والوهم جاب العما
لجل الأماني تخيب
ماتفوقوا يا أهل اضنا
دا انتوا اللي فيكوا العيب
****
أرض الملايكه سما
أرض الملايكه جود
مفيهاشي لا مسيلمه
ولا فيه بشر مهدود
ولا فيهم المفسده
والظلم
ماله حدود
ولا فيه رضا بالأذى
ولا فيه أذى موجود
****
أرض الملايكه بشر
بيحلموا بملاك
ينزل يسيب السما
ويرتمي في هلاك
لجل يحكوله المظالم
ويفتحوا الشباك
اللي طالل ع المذله
واللي راميلهم شباك
واللي طارد أي حق
حتى لو جابه الملاك
موسى خالد
ليست هناك تعليقات:
إرسال تعليق