38
عيد ميلاد رئيس
يا سيادة الرئيس
يا للي مطلى في السيادة
كل سنه وأنت
دايما في أعيادك سعادة
وكلنا ف عزك بنلطم
وهمنا دايما زياده
وبنشرب المر في كاساتك
وقهوتك بالدم ساده
كل سنه يا رئيسنا وانت
مربط الكل ف بياده
****
يا سيادة الرئيس
يا بن العوالي والغوالي
يا للي رخصت اللي غالي
يا للي غليت الرخيص
يا خبيث
كان بودي
إنك إنت تكون رئيس
****
كل سنه وأنت
معيش الكل ف سواد
كل سنه وانت
بتوزع الهم اللي زاد
ولامم الشلة السعيدة
والظلم والإلحاد
شلة الكفره اللي حلوا
ولدمنا والروح أحلوا
وبينهشوا في لحم العباد
شلة الباطل بيعلا
والرخيص الواطي يغلا
والحق يزويه الفساد
****
كل سنه وانت
زي ما انت
ديكتاتور
فاتح الكنز لحبايبك
وبيتبني ليهم قصور
وللغلابه اللي زيي
بتحفروا دايما قبور
ماسك الفزاعه دايما
للي ينطق أو يثور
ياللي كنا جوه عينك
وتعما عينك
اللي كنا فيها نور
****
كل سنه وانت
ف زيادتك تزيد
ما انت اللي سارق اكلنا
ومحول الكل للعبيد
ما إنت اللي خليت الغلا
يخلي نار الكون تقيد
ما انت اللي خليت الكلام
ماعدش ينفع او يفيد
****
كل سنه وانت
لسه في محرابك
بتوزع الفته
على كل أحبابك
فاتح ببان الاسى
للي سعى وجابك
للي الخاذوق شلهم
ولسه طلابك
ليست هناك تعليقات:
إرسال تعليق