جندي صعيدي
صعيدي و عرضه ف أرضه
و الدم لأجل العرض يهون
شاف انجاس هاتمس الأرض
شد سلاحه على الصهيون
دا تراب مصر و روحنا فداه
و اللى يفرط فيه ملعون
سبع و شارب من صدر امه
جينات العزة تفوق مليون
جندى صعيدى عينه قويه
صخر ف وش رياح الكون
نظرة عينه أقوى رصاصه
قبضة ايده مدفع هون
جسمه سلاح فتاك و دمار
قلبه حديد بالنار معجون
حط حياته ف قبضة ايده
باعها بشبر تراب مركون
حامي عرينه حافظ حده
وصية جده اوعى تخون
شاف اعدائه مدو رجولهم
فاكرين إنه وديع و حنون
خاف تتنجس اطهر ارض
فتح النار تقول مجنون
واحد هو و هما كتير
هز سلاحه يارب العون
ساوى اعدائه بوش الارض
سفّو ترابها كما الأفيون
و هو يعيشها عظيم الشان
زي ما كان من عهد آمون
أو يتخلد جنب الشهدا
جوا الجنه مكان مضمون
شحاته على أبو درب
ليست هناك تعليقات:
إرسال تعليق