لما بترفض تبقى جبان
ولاتحنيش راسك لانسان
وتحارب ظلم وطغيان
تبقى التهمه اكيد اخوان
لما بتحلم في الحريه
وتكون روحك حره ابيه
عايش عمرك لاجل قضيه
تبقى التهمه اكيد اخوان
لما عنادك يبقى زياده
علشان بلدك تلقى سعاده
لما بتكره حكم بياده
تبقى التهمه اكيد اخوان
لما تكون عكس التيار
ولابتسلم للاشرار
لما تكون من الاحرار
تبقى التهمه اكيد اخوان
لما تقول للباطل لأ
لما بتنطق كلمة حق
لما تكون صاحب مبدأ
تبقى التهمه اكيد اخوان
لما تكون وطني وغيور
لما تقول للظالم غور
وتكون شهم وقلب جسور
تبقى التهمه اكيد اخوان
لما بتعشق اسم بلادك
واقصى طموحك استشهادك
ولاترضاش تحني لجلادك
تبقى التهمه اكيد اخوان
لما ضميرك يبقى شعارك
ولاحد ايحدد افكارك
لما المولى يبقى خيارك
تبقى التهمه اكيد اخوان
لما بتكره حكم العسكر
ولاتقبلش طاغوتهم يكبر
لما الخوف جواك يتكسر
تبقى التهمه اكيد اخوان
لما بتحلم في التغيير
تحلم بلدك يبقى كبير
لما تضحي لاجل الخير
تبقى التهمه اكيد اخوان
لما تقاوم ضد الريح
لما تكون للحق صريح
لما يكون هدفك تصحيح
تبقى التهمه اكيد اخوان
لما تعافر لاجل تعيش
ولا تقبل ذل وتهميش
لما يجيشوا ضدك جيش
تبقى التهمه اكيد اخوان
لما تكون ضد الجبروت
صاحب كلمه ورأي وصوت
لما بترفض حبس وموت
تبقى التهمه اكيد اخوان
لما يحاربك كل خسيس
كل لعين وكل ابليس
لما تكون جواك قديس
تبقى التهمه اكيد اخوان
رائد جبار الذهبي
ليست هناك تعليقات:
إرسال تعليق