كل مابعد
القي حاجه رجعتني
والقى جرحي ليه سابقني
كل فرحه المحها بره
القي دمعه غرقتني
كام سنه وقطر الحياه
كلنا راكبين معاه
كل واحد ليه محطه
عمر مكتوب م الاله
بكره يابكره
انت جاي والا رايح
الجراح ملو الصفايح
والوجع مالي الطريق
ارمي حبه م الاماني
وشد روحي م الغريق
نفسي المح اي حاجه
جوا بحر مالوش شطوط
نفسي اطير وافرد جناحي
وابقي فوق كل البيوت
نفسي، احس بضحكه واحده
ضحكه مش ممكن تموت
بكره يابكره الغناوي
تبقي ميه في المراوي
ترسا عالبر المراكب
تملا بالنور الشقوق
بكره يامعكر تروق
بكره نلقى الحلم طارح
بالسنابل
نلقي ورد كتير مفتح
غصب عن عين القنابل
بكره هاتدور السواقي
تسقي في غيطان الشراقي
بكره يجي الصبح تاني
يرسم النور عالحيطان
ويشبك الاحزان بفرحه
نلقي كل الليل بيبان
............................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق