جنون
جنون
أنا جربت أكون مجنون
وسط عقول على طول تعبانه
وإتدربت إني أكون
جوه جنان الكون مسجون
ويا نفوس دايما خرفانه
أبكي وأضحك ع المضمون
والمضامين على طول هلكانه
وضربوا الأعور
أأأأأه على عينه
قال كده كده العين خربانه
قلة عقل وقلة حيله
والنخوه على طول هربانه
يالا تعالوا كمان نتجنن
ويشرفنا تكونوا معانا
****
عمك بندق راح السيما
وكان يتمنى حاجه قديمه
لقا افلام من زوقها عديمه
هز ورقص وقلة قيمه
داخل فيها سياسه لئيمه
وحس ان احنا في وسط غنيمه
والسيما معاها الفزيون
بيبثوا للكام مليون
أفكار واضحه وناضحه كمان
باللي بيخص الاعلام
م المسخره ويا الاوهام
فضل بندق إنه ينام
بعد ما قضاها شتيمه
****
عالم كله جنان ف جنان
أيا كنت وأيا كان
والعاقل بقا فيه تعبان
ومفيش قيمه للإنسان
واللي يفكر يتذكر
إن إحنا عايشين ف طوفان
بالتضليل ومعاه حرمان
وشعور دايم بيقول بكره
جاي غلبان
جاي يترنح
ماشي متنح
حاسس إنه
غصب عنه
بقا عره ومفهش أمان
والمتغطي بيه عريان
ولازم منه تكون قلفان
ولازم تبقا كمان ندمان
وجوه حيطان السجن الدايم
بالكبت بتصنع ف كيان
وغيرنا ويا الموج
اهو عايم
انشاله تبقا بدنجان
****
جو مخيف
فيه الحق هزيل ونحيف
فيه الكدب بياخد دايما
سوكسيه عالى من التصقيف
واللي هينطق أو يتكلم
يتقال إنه عقله خفيف
وان كمان الفتنه ف دمه
وإنه سخيف
****
إوعاك تضحك م الأكاذيب
وإتأكد إنك هتخيب
وإتعلم برضه الأساليب
وكمان إرضي الشله الصايعه
وإهتف وإعزف بالترحيب
م الكل بيكدب وينافق
وإتعلموا من عمرو أديب
وأحمد موسى ومصطفى بكري
وطنطك سلوى ونجوى وفكري
والهتيفه في زمن العيب
****
كون مجنون
واللي ف ايده الحكم يا صاحبي
عابد للكرسي بجنون
لامم شله معاه والعله
إنه بذاته مفتون
ولما بينطق أو يتكلم
أو بيمثل إنه حنون
تعرف إنه كمان ملعون
ولما بيضحك والصوت يعلى
تلقا نفور بيغطي الكون
وتعرف إنه مش موزون
عايش كدبه وقايل كدبه
وخلى الشعب يعيش مديون
خلى بلدنا ومليون مدنه
تصرخ تطلب من مولاها
شوية عون
وإنه يكون على طول وياها
ويطهرها م الفرعون
خالد موسى
ليست هناك تعليقات:
إرسال تعليق